Utsikten – Landeskogen

Nydeleg tur som kan kombinerast med andre spanande opplevingar!
Utsikten Landeskogen er eit fint turmål ved LandeskogenGrendi i Bygland.

Skrive av Geir Daasvatn

Det er om lag 17 km å køyre frå Evje sentrum til Grendi. Her kan du starte turen frå parkeringsplassen ved Årdal kyrkje.  Du følger vegen mot Landeskogen. Løypa er merka, og det er lett å finne fram.

Utsikten turløype mellom Landeskogen og toppen. Grendi i bakgrunnen. Foto: Geir Daasvatn

Når du har gått vegen opp til og forbi Landeskogen, kjem du inn på sjølve turløypa i skogen. I 2011 leia Roald Rysstad eit svært dugnadsprosjekt, der 16 vanskelegstilte tyske ungdomar var med og rydda fire km med attgrodde stiar i området rundt Landeskogen. Mellom desse var stien mellom Landeskogen og Utsikten. Løypa er difor godt opparbeidd, og lett å gå utan synderleg stigning.

Vel framme på Utsikten blir du lønna med eit fantastisk fint utsyn ut over Byglandsfjorden. Du kan bare sette deg på benken der og nyte synet!

Du kan gå same vegen tilbake, eller følge ein annan merka sti slik at du får ein rundtur. Rundturen vil vere om lag to km lang. Om du går same vegen tilbake, blir turen litt lenger.

Enten du tek den eine eller andre vegen, vil vi sterkt anbefale eit stopp på Landeskogen Fredssenter som ligg like ved.

Utsikten har vore med i Otra ILs Ti Toppers. Løypa er også med i Reumatrimmen, turopplegget til Setesdal Revmatikerforening.

Eit fint alternativ

I staden for å gå på asfalten frå parkeringsplassen ved kyrkja, kan du starte turen frå den gamle skulen i Grendi. Han ligg på veg mot Hovstad, men bare eit par hundre meter frå kyrkja. Rett aust for skulen og grendehuset renn Nordåni. Følg stigen som går på nordsida av elva gjennom skogen. Du kan følge stigen til du kjem til grusvegen eit lite stykke ovanfor Landeskogen. Gå nokre få meter tilbake mot Landeskogen, og du vil sjå skilta som syner veg vidare mot Utsikten. Nå er du inne i den blåmerka løypa som er vist på kartet til VisitSetesdal.

Ha ein fornøyeleg tur!

Kjelder

Klikk på bilda for forstørring

BEDRIFTSOVERSIKTEN - Støtt det lokale næringslivet. Kjøp tjenester og produkter lokalt.